“Zarauzko alkateak emandako epea, amaitzear”
-Urola Kostako Hitza-
Tomaxen teoria eta Peru, Xabaten jangelako lurrean hilda.
Tomaxek erantzun bila Xabati begiratu zionean, hark begirada maltzurra itzuli zion eta bihotza eztarrian zuela, Tomaxek bere burua hiltzailearekin aurrez aurre topatu zen. Biak ala biak, eskuak izter ondoan zabalik, errebolberra lehenbizi nork aterako zain egongo balira bezala izoztu ziren.
Errebolberra beharrean ordea, Xabat izan zen zortziko txikia ateratzen lehena:
Guztiz oker henbilen
Tomax detektibe
Kasua argitzeko
Ideiarik gabe
Ni neure jardunean
Bai izan naiz trebe
Zu gaur nire eskutan
Bertan hilda hobe.
Azken gertakariek guztiz irauli zuten Tomaxen garuneko datu basea eta ideiak berrantolatzeko denborarik gabe, desafioa onartu eta modu berean erantzun zion:
Nolatan okertu haiz
Xabat horrenbeste
Zati txikitan egin
Hainbat mutil gazte
Nireak egin dik bai
Ez nian nik uste
Bizitzen utzi behintzat
Hau ulertu arte.
Xabatek, Tomaxen azken desioa betetzea erabaki zuen:
Neskatan ez nauk izan
Inoiz ni abila
Gauero jasan behar
Giri guapo pila
Behin hurbildu zitzaidan
Neuri neskatila
Ni konturatzerako
Peru haren bila
Australiar guaperasak
Ehizatzea xede
Goizeko bostetako
Mozkortuta daude
Garbiketa eginaz
Herrian mesede
Esker txarreko lana
Egin dut debalde
Peru atxilotzeko
Nik zu nahi zintudan
Eskura jarritare
Ez zinen gai izan
Gonbitea jasota
Aukera hor neukan
Zuen bizitzen truke
Garaile jokuan.
Motiboak ulertuta baina, bizkarretik beherako hotzikaraz, etsaiari aurka egitea beste aukerarik ez zitzaion geratzen Tomaxi:
Ez dek harritzekoa
Barruko sugarra
Gauero guzti hori
Aguantau beharra
Jelosiaren erruz
Galdu duk altxorra
Lagun bat hil duk eta
Berdin haiz zatarra
Xabatek kolpea nabaritu eta pauso bat atzera eman zuen saihets aldeari helduta. Bazuen ordea oraindik erantzuteko adorerik eta gogorrago ekin zion:
Grissom izan nahi eta
Arlote jokatu
Detektibe ustetan
Pailazo bihurtu
Zarauzko herritarrak
Gogotik lotsatu
Barre eragiteaz
Ez al haiz aspertu?
TAO-ko txalekoa
Pipa ta bonbina
Behin eta berriz hanka
Sartzeko makina
Irabazi nahi huen
Herriko domina
Ez duk hala izango
Nire dolumina
Falta zaizkik oraindik
Giza arrastoak
Neuk emango dizkiat
Neure errezetak
Arrai zopa ederra
Ta piper beteak
Estarlux-aren ordez
Gizaki pusketak
Tomaxek ere larri eutsi zion jipoiari. Aurpegia, RAL 6011 makina berde kolorekoa jarri zitzaion, aho ertzetik bitsak zerion bitartean. Arnasestuka, eskuak belaunetan, hauspoa bete eta azken erasoari ekin zion:
Gorputza landu eta
Luxuan gastatu
Baina oinarrizkoaz
Ez haiz konturatu
Aurpegi zatar hori
Hobe operatu
Oraindik sexu gela
Ez dek estreinatu
Ezin izan zuen Xabatek azken bertso hura irentsi. Ezustean, barren barrenean kolpatu zuen Tomaxen zortziko txiki zorrotzak eta konbultsio artean, zurbil, galtzaile ikusi zuen bere burua.
-Hi Xabat, sudurrian piperra dakak…- adierazi zion Tomaxek.
Xabatek hatza dardarka sudurrera eraman, hari begiratu eta – Ez… odola dek- esan, eta bertan hilda erori zen.