Zarauzko Argazkizale Elkarteak XXV. Nazioarteko Argazki Mostra antolatu du, eta gaur arratsaldean (azaroaren 17an) inauguratuko dute Sanz Enea kultur etxean, 19:00etan. Honako argazkilari hauen lana izango dira bertan ikusgai: Jorge Castejon, Iñaki Delgado, Colin Flockton eta Laura Madrazo. Erakusketa urtarrilaren 21era arte egongo da zabalik, 18:00etatik 20:00etara.
Txokoak erakusketarekin bestelako errealitate bat aurkezten du Ines Uribe argazkilariak, "konposizioak eratuz, mundu urbanotik abiaturik hartutako erreferentzia bisualen independenteak izan daitezkeenak". Gaur zabaldu dute eta urtarrailaren 7a bitartean ikusteko aukera izango da, Photomuseumen.
Hotz-Zarautz erakundearen ekimenez, gaur (abenduaren 14an) errefuxiatuen inguruko Noraezean argazki erakusketa inauguratuko dute Ipar kaleko Lukas ardotegian. Erakusketako argazkien egileak Diego Montalbo eta Jose Márner dira, eta Montalbo bertan izango da. Irekiera ekitaldia 19:30ean izango da, eta Iraia Elias aktoreak irakurtaldia eskainiko du, Alex Gurrutxagak pianoarekin lagunduta.
Kaleko Elkartasun eta Kultur Elkarteak antolatuta eta udalak babestuta, azoka solidarioa izango da larunbatean zein igandean. Merkatu plazan atonduko dituzte postuak, eta bigarren eskuko liburuak, diskoak eta bestelako materiala jarriko dute salgai. Era berean, herritarrek etxetik ekarritakoak ere jasoko dituzte, berriro erabiltzaile berrien esku jartzeko. 10:30etatik 15:00etara eta 16:30etatik 20:00etara egongo da zabalik.