Urola Kostako Udal Elkartea Kosta bailarako kultura eta sormen industrien mahai sektoriala martxan jartzera doa. Mahai hori osatzeko bilera irekia antolatu du hilaren 14rako; elkartean bertan egingo dute, 09:30etik 11:30era. Izena emateko epea gaur bukatuko da; harrera@urolakosta.eus helbidera idatzi daiteke horretarako edo 943-89 08 08 telefonora deitu.
Judith Gago diseinatzaile eta argazkilari zarauztarrak erakusketa zabalduko du urtarrilaren 11ean, ostegunean, Lukas ardotegian. Habit-Arte. Garuna, gorputza eta espazioa du izena argazki bildumak eta otsailaren 22ra arte egongo da ikusgai.
Begirada kontzienteak erakusketa zabaldu berri dute Sanz Enea kultur etxeko aretoan, Calcuta Ondoan elkarteak eta Zarauzko Solidaritate Koordinadorak antolatuta, Zarauzko Udalaren laguntzarekin. Inaugurazio ekitaldia bihar arratsaldean egingo dute, eta martxoaren 4ra arte ikusteko aukera izango da; ekintza osagarriak ere antolatu dituzte erakusketak irauten duen bitartean.
Patafisika oinarri hartuta, Alberto Palomerak erakusketa ondu du Zarauzko Photomuseumen. Ostiralean hitzaldia eskainiko du egileak, museoan bertan.