Santa Klara komentuaren etorkizunaz bilera irekiak egiten ari da EH Bildu herritarrekin, eta asteazken honetarako (martxoak 7) beste bilera bat deitu du Alde Zaharreko auzokideentzat. Gaztelekuan egingo dute bilera, 19:00etan hasita. Bestalde, joan den asteko elurtearen eraginez, bertan behera utzi zuten Vista Alegreko bilera martxoaren 13an egingo dutela iragarri dute.
Patafisika oinarri hartuta, Alberto Palomerak erakusketa ondu du Zarauzko Photomuseumen. Ostiralean hitzaldia eskainiko du egileak, museoan bertan.
Judith Gagoren argazki erakusketaren ondoren, orain Antonia Faus margolariaren lanak daude ikusgai Lukas ardotegian (Ipar kalea, 3). Modu autodidaktan ikasitakoa da Faus, eta olio pinturaz landutako margolan figuratiboak jarri ditu erakusgai. Aurreko astean ireki zuen erakusketa, eta datorren apirilaren 12a bitartean bisitatu ahal izango da.