Bihar, osteguna, 18:30ean hasiko da jardunaldia Gaztelekuan, Ekonomia berriaren iraultza izenburupean. Doakoa da, eta bi adituk hartuko dute hitza: Marcel Dingak eta Pedro Pardok.
Ostegunean, 19:30ean, Josu Zabaleta itzultzaileak Garoa liburudendan Dino Buzzatiren Tartariarren basamortua liburua izango du mintzagai, beste hamaika konturen artean.
Patafisika oinarri hartuta, Alberto Palomerak erakusketa ondu du Zarauzko Photomuseumen. Ostiralean hitzaldia eskainiko du egileak, museoan bertan.
Judith Gagoren argazki erakusketaren ondoren, orain Antonia Faus margolariaren lanak daude ikusgai Lukas ardotegian (Ipar kalea, 3). Modu autodidaktan ikasitakoa da Faus, eta olio pinturaz landutako margolan figuratiboak jarri ditu erakusgai. Aurreko astean ireki zuen erakusketa, eta datorren apirilaren 12a bitartean bisitatu ahal izango da.