Kulturaren difusiorako Aula/Gela programaren aste honetako saioan Kirsten Johnson zine eta argazki zuzendaria aztertuko dute. Bere ibilbideaz gain, autobiografia pertsonalari buruz ere mintzatuko dira. Ostiralean, azaroak 30, izango da doako saio hau, 18:00etan Photomuseumen.
Zientzia eta teknologia bertatik bertara lelopean, telebistaren negozioari buruzko hitzaldia antolatu du ZarautzOn elkarteak, azaroaren 30erako, ostirala. Mikel Lejarza Atresmediako lehendakariak eskainiko du saioa, 19:00etan Antoniano aretoan. Gaztelaniaz izango da.
Iñaki Bidegainek Siriad y el tapir... y el jaguar eleberria aurkeztuko du ostiralean, 19:30ean Zazpi kultur elkartean. Abenturaz betetako liburua dela jakinarazi du idazleak, eta oihanak, Amazonetako ibaiak, tapirrak eta jaguarrak dira protagonista.
Zarauzko Argazkizale Elkartearen eskutik, 26. edizioa izango da aurtengoa, eta Gipuzkoa, Kantabria eta Malasiako argazkilarien lanak bilduko dituzte Sanz Enean.
Urtero bezala, Balurdin Orokieta Herri Eskolako gurasoen elkarteak bigarren eskuko jostailuen azoka antolatu du astebururako, Orokietako gimnasioan.