Igandean jokatu zuten txapelketa, Usurbilen (Gipuzkoa). Hiru minutuko hiruna txandatan honako harriak altxatu behar zituzten: 125 kiloko zilindroa, 112,5 kiloko kuboa eta 100 kiloko bola. Aimar Irigoien errezildarrak 80 jasoaldi egin zituen bederatzi minutuan, hau da, 9.075 kilo altxatu zituen. Zortzi jasoaldi gutxiagorekin –72 guztira–, 8.200 kilo igo zituen Mikel Lopetegi Urrak.
Hodei Iruretagoiena Izeta IV.ak ere 73 jasoaldi egin zituen, baina Urrak baino pisu gutxiago altxatu zuen: 8.137,5 kilo. Iñigo Eizagirre Eiza sailkatu zen laugarren postuan.