Hainbat urtez ez da antolatu, eta aurten txapelketa berreskuratzea erabaki du Zumaiako Pulpo eskubaloi taldeak. Hala, larunbatean jokatuko da Udako Eskubaloi Torneoa, udalerri horretako Lubaki kiroldegian, 17:30etik aurrera. Aurten, txapelketa triangularra izango da, gainera: Amenabar, Bidasoa eta Benidormen artekoa.
Hiru partida izango dira: 17:30ean Bidasoa eta Amenabarren artean, 18:30ean Benidorm eta Bidasoaren artean eta azkenengoa, 19:30ean Amenabar eta Benidormen artean. Benidorm eta Bidasoaren arteko partida hasi aurretik bi talde horietako jokalari bana omenduko dituzte: Bidasoako Kauldi Odriozola eta Benidormeko Ander Torriko zumaiarrak, hain zuzen. Orain dela gutxi itzuli dira biak Europako txapelketa irabaztetik.
Sarrera 8 euro kostako da. Pulpoko bazkideek gaur 18:30etik 20:00etara Pulpok Lubakin duen bulegoan bina sarrera erosteko aukera izango dute. Bazkide ez direnek, berriz, sarrerak bihar 19:00etatik 20:00etara bulegoan eskuratzeko aukera izango dute.
Partidaren egunean, larunbatean, 16:30etik aurrera ere salduko dituzte sarrerak kiroldegian bertan.