Telmo Esnalen Dantza filmaren agertoki bilakatu da Torreoia egunotan. Hain zuzen ere, bertan izan da zuzendari zarauztarra, 2018an estreinatuko duen bere azken lana grabatzen. "Beti irudikatu dut garai batean dantza emanaldiak egingo zirela Torreoian", adierazi du, "leku paregabea" dela aitortuz. Lanean itsasoko irudiak falta zitzaizkien eta Torreoia leku aproposa dela ondorioztatu zuten: "Vista Alegreko parketik itsasoa ikusten da eta polka dantzak grabatzeko leku ezin hobea zen nire ustez", adierazi du Esnalek.
Grabazioarekin hasi aurretik, udalak hainbat txukunketa egin ditu eraikinean eta inguruetan, eta Esnalek eskerrak eman dizkio udalari zein bertako bizilagunei, eman dizkieten erraztasunengatik."Torreoia eta Vista Alegreko pareka leku magikoak dira eta seguru gaude filmari ukitu berezia emango diola inguru honek", nabarmendu du Kultura zinegotzi Nekane Iribarrek. Esnalek filmaren zati batzuk Zarautzen grabatzea erabaki izana "luxua" dela aitortu du Iribarrek, eta "Zarautz mundu zabalean erakusteko aukera aparta" dela. "Gainera, oso geurea den zerbaiten harira, euskal kultura eta dantzarekin lotuta, alegia", gaineratu du.
Aurreikuspenen arabera, otsaila erdialdean amaituko dute Dantza. Torreoia, berriz, 2018an hasiko da udala eraberritzen, "aspaldiko eskaera bati erantzunez".
