Irudietan: Bizikletaz gozatzeko larunbat goiza

Ehundaka haurrek eta gurasok hartu dute parte Mugikortasunaren Astearen barruan antolatutako bizikleta martxan.

Goiz eguzkitsuari probetxua ateraz, Mugikortasunaren Astearen barruan antolatutako bizikleta martxarekin bat egin dute ehundaka herritarrek.

Antolatzaileek azaldu dutenez aurten inoiz baino jende gehiago animatu da ekintzan parte hartzera. "Beste urteetan eguraldi txarra tokatu izan zaigu, eta aurten eskola ezberdinekin elkarlanean aritu gara, beraz, jende kopuruan asko nabaritu da hori". Bestalde, herrian zehar egin duten bueltan autoekin eta oinezkoekin elkarbizi behar izan dute bizikletan zihoazenek, eta "arazorik ez dela izan" azaldu dute. "Ekintzaren helburuetako bat horixe zen hain zuzen ere, bizikletek gainontzeko ibilgailuekin elkarbizitzea".

Horrez gain, ekintzan parte hartu duten txikienak oso gustura azaldu dira proba bukatu ostean. Hala esan digu txirrindulari batek, amaieran eman dioten txokolate beroa eskuetan zuela: "hasieran oso pilatuta gindoazen, baina aurrerago joan ahala banatzen joan gara, eta oso ondo pasatu dugu".