zarauzkohitza.eus

Nazioarteko Federazioko kide izatea eskatu du EHSFk

Zarauzko Hitza 2018-11-15 13:44   Kirola

2005era arte izan zen kide, baina ordezkaritzarik gabe geratu zen Espainiako Federazioa sartu ondoren

Nazioarteko Federazioko kide izatea eskatu du EHSFk
Maialen Saenz, EHSFko presidenteordea, ISAren egoitzaren aurrean. | Ikusi handiago | Argazki originala

Eusko Jaurlaritzaren babesarekin, Euskal Herriko Surf Federazioak (EHSF) eskaera formala egin du Nazioarteko Surf Federazioko (ISA) kide izateko. Maialen Saenz EHSFko lehendakariorde eta Gipuzkoako Federazioko presidenteak egin du eskaera, ISAren egoitzan, La Jollan (AEB). «Lehen urratsa da EHSFk 1990ean nazioartean zuen tokia berreskuratzeko».

Berreskuratu esan du Saenzek; izan ere, Euskal Herriko Surf Federazioa Europako Federazioko kide izan zen 15 urtez, 1990etik 2005era, baina tokirik gabe geratu zen Espainiako Surf Federazioa sortu eta gutxira. EHSFren eta Eusko Jaurlaritzaren iritziz, nazioartean berriro ordezkaritza izateko arau eta lege baldintzak betetzen ditu federazioak. Asmoen berri ere eman diote Espainiako Federazioari. EHSFko kideek Jorge Fernandez Jaurlaritzak AEBetan duen ordezkariaren laguntza eta babesa izan dute.

Eskaerak EHSFren batzarraren babes osoa izan zuen. «Kirol eta kultur aldarrikapena da. Helburua da surflari profesionalak babestea, eta horiek izan dezatela aukera munduko txapelketetan euskal selekzioa defendatzeko», esan du Saenzek. Eskaerari indar handiagoa emateko, ikus-entzunezko lan bat ere helarazi diote ISAri, «surfak Euskadin duen indarra erakusteko».

Albistea osorik irakurtzeko, egin klik hemen.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa