Atzo gauean Zarauzko Putzulo Gaztetxea bertsozalez bete zen, 2018ko Kopla Txapelketa jokatu baitzen bertan. Beñat Lizaso, Manex Agirre, Libe Goenaga, Aitor Mendiluze, Paule Loizaga, Maialen Lujanbio, Iñigo Mantzizidor Mantxi, Eneko Lazkoz, Oihana Bartra eta Maialen Akizu aritu ziren bertsotan, eta Beñat Intxauspek eta Usua Martinez Maritxalarrek egin zituzten aurkezle lanak.
Saio ederraren ondoren, Maialen Lujanbio eta Mantxi iritsi ziren buruz burukora, eta azkenean Maialen Lujanbiok lortu zuen 2018ko Kopla Txapelketako zintzarria.