Atzo, igandea, jokatu zuten Euskadiko txirrindularitza txapelketa, Markinan (Bizkaia). 38 txirrindularik hartu zuten parte 23 urtez azpikoen lehiaketan, eta guztira 115 kilometroko ibilbidea egin zuten.
Goierriko TB-Laboral Kutxa eta Eulen taldekoak izan ziren nagusi atzokoan. Goierri TB-Laboral Kutxakoek lehen eta bigarren postuak lortu zituzten; Iker Ballarin (2:59:04) izan zen txapelduna, eta Unai Iribarrek (2:13 minutura) bigarren egin zuen.
Eulen taldekoek ere lortu zuten podiumean sartzea; Joseba Lopezek hirugarren postua eskuratu zuen (2:13 minutura), eta Euken Gallegok (2:16 minutura), laugarrena.
Dena den, jardunaldi gazi-gozoa izan zen Zarauzko taldekoentzat. Euleneko Andoni Azkarate arrasatearrak erorialdia izan zuen lasterketan; errepideko baranda kolpatu zuen lepoarekin. Osasun azterketak egin ditu dagoeneko, eta dirudienez, ez du ondorio larririk izango.