Zarauzko Udaleko Gobernu Batzarrak maiatzaren 13an onartu zuen euskara eta UEUko ikastaroak emateko 2019rako deialdia. Zarauzko Udalak eta bere Erakunde Autonomoek dirulaguntzak emateko Ordenantza Orokor arautzailea (2008) eta Euskara ikastaroak egiteko dirulaguntzak emateko oinarri espezifikoak. 2019. urterako oinarri espezifikoak (2019) ditu oinarri onartu berri duten deialdi horrek.
Zarauzko Euskara Ordenantzak jasotzen du udalak "neurri egokiak" hartuko dituela euskara "gizarte esparru guztietan erabil dadin" eta "gizarte bizitzan euskararen presentzia gehi dadin". "Euskararen zabalpen funtzionala" da horretarako zehaztutako "bitartekoetako bat".
Hala, udalak azaldu du "oso garrantzitsutzat" jo duela "helduen euskalduntzean eta alfabetatzean eragitea". "Bestalde, araututako ikastaroetatik aparte, euskara hutsean ikastaroak egiteak (UEU) ere garrantzi berezia hartzen du hizkuntzaren ikuspuntutik. Horrexegatik, hain zuzen ere, aurrekontu partida bat ezarri du 2018-2019 ikasturtean zehar euskalduntze ikastaroetara eta UEUko udako ikastaroetara doazen Zarauzko biztanleei bekak emateko", gehitu du.
Udaletxeko Erregistro Orokorrean aurkeztu behar dira dirulaguntzak eskatzeko dokumentuak, alegia, Herritarren Harrera Zerbitzuan (Kale Nagusia, 29) edota Udal Zerbitzu Telematikoetan. Dena den, erritarrek ikastaroa egin ostean egin ahalko dute dirulaguntzaren eskaera. Ikastaroa uztaila aurretik egin badute, uztailaren 1etik aurrera eskatu ahalko dute dirulaguntza, uztailaren 15era arte. Ikastaroa uztailetik irailera bitartean landuko badute, aldiz, irailaren 16tik aurrera egin beharko dute eskaera. Urriaren 4ean itxiko dute epea.