Datorren asteburuan jokatuko dute Euskadiko Beteranoen XXXIII. Xake Txapelketa, Zarautzen. Zarautz Kirol Elkartearen egoitza egokituko dute horretarako: "Xakeko joko gela erraldoi bilakatuko dute egoitza", azaldu dute elkarteko kideek.
Sistema suitzarra ezarriko dute txapelketan, hau da, sei errondako sistema. Larunbatean 10:00etan izango da lehenengo erronda; bigarrena, 12:15ean; hirugarrena 16:00etan; eta laugarrena, 18:15ean. Igandean ere jarraituko du lehiak; 09:30ean bosgarren erronda jokatuko dute parte hartzaileek; eta 11:45ean, seigarrena. Partida bakoitzak ordubeteko iraupena izango du, gutxi gorabehera.
Zarautz Kirol elkarteko kideen arabera, "txapelketak Euskadiko xake jokalari onenak bilduko ditu Zarautzen". Tartean izango dira Zarauzko taldeko hainbat kide ere; hala nola, Jaime Arozena, Fermin Lauroba edota Fran Ladron de Guevara.