Galiziako hotsek, koloreek eta usainek hartu dute Zarautz beste urte batez

Galiziako eguna ospatu dute iragan asteburuan, 36. aldiz. Gaita-poteoa eta kalejirak izan dira Zarautzen, baita bertako dantzez edota gastronomiaz gozatzeko aukera ere.

Carballeira elkarteko kideen eskutik, pasa den asteburuan izan da Galiziako eguna Zarautzen, 36. urtez jarraian. Larunbatean hasi ziren ospakizunak; arratsaldean gaita-poteoa egin zuten herriko kaleetan barrena, eta gauean, dantzaldia izan zen Musika plazan, Os Agarimos taldearekin.

Ospakizun nagusiak, baina, igandean izan ziren; goizean hasi ziren kalejirak alde zaharreko kaleetan, eta Galiziako doinuek eta koloreek hartu zuten herria. Eguerditik aurrera, urtero bezala, dantza emanaldiez edota gastronomiaz gozatzeko aukera izan zen Iñurritzan.