"Testuingurua ematen saiatuko gara gauero"

'Gakoak' saioa estreinatu du bart Hamaika telebistak. Aktualitatearen analisirako tarte bat zabalduko dute gauero astelehenetik ostegunera, eta Larrañaga izango da aurkezlea.

Urola Kostako Hitza-n eta Info7 irratian aritu zen Hamaikara iritsi aurretik Oihan Larrañaga (Zarautz, Gipuzkoa, 1988).

Goiz hasi duzue denboraldia Hamaikan. Indartsu?

Bai, irailarekin batera hasi gara, baina horrek aukera emango digu bizkor martxa hartzen. Errodajea eta indarra beharko ditugu, beste batzuk udazkenean hasten direnerako.

Gaien analisian sakontzen saiatuko zarete Gakoak saio berrian. Nola egingo duzue hori?

Albisteak kontatzera mugatu beharrean, testuingurua ematen saiatuko gara gauero. Badakigu zein diren gure indarguneak eta zein gure mugak. Zerbait gertatzen denean, milaka telebistak guk baino bizkorrago emango dute albistea. Ez du zentzurik horiek imitatzen saiatzeak. Baina saia gaitezke testuingurua ematen, analisiak egiten: kontatu baino gehiago, azaldu egingo dugu.

Analista asko azalduko dira saioan?

Egunotan ari gara analistak lotzen. Pixkanaka agertuko dira.

Irudi aldetik nola hornituko duzue programa?

Gurean Gaur albistegia 18:30ean, 19:30ean eta 20:30ean emango dugu, bi minutuko bideo albisteekin. Horietako batzuk erabiliko ditugu Gakoak saioan, baina ez dira horiek bakarrik izango. Hainbat formatutan emango ditugu albisteak.

Irakurri elkarrizketa osorik, berria.eus atarian.