Zarauzko Gurutze Gorriaren Herri Biltzarrak Lehen Sorospenen, Desfibrilagailu Erdi-Automatikoaren Erabilerarako eta Uretako Sorospen ikastaroak antolatu ditu, eta datorren astetik aurrera eskainiko ditu; irailaren 16tik aurrera, alegia.
Lehen Sorospenen ikastaroa biztanleria guztiari zuzenduta dago, eta bertan ezusteko gaixotasun edo istripu baten aurrean eman beharreko oinarrizko pausoak irakasten dira, bihotz-biriken berpizkundea, zaurien ardura etab landuz. Ikastaroan izena emateko baldintza bakarra gutxienez 16 urte izatea da, eta era berean, unibertsitatean aukera askeko kredituak lortzeko baliagarria da.
Desfibrilagailu Erdi-Automatikoa erabiltzeko ikastaroan bihotz-geldialdian hain erabilgarriak diren gailu hauek nola erabili erakusten da, formatu laburrean.
Uretako Sorospenen ikastaroan uretan eta itsasoan sorospena emateko teknikak lantzen dira, hondartza eta itsas-inguruaren ezagutzaz gain. Ikastaro hau egiteko 18 urte beteak izan behar dira.
Informazioa eskuratu edota izena eman nahi duenak 610 10 28 72 telefonora deitu dezake edo zarautz@cruzroja.es helbidera idatzi.