Bihar, larunbata, egun osoko elkarretaratzea egingo da Udaletxe Plazan, gose eta egarri greban dagoen Patxi Ruiz euskal preso politikoari elkartasuna adierazteko.
Goizeko zortzietan emango diote hasiera Ruizen egoera salatzeko antolatutako ekimenari, bihar 13. eguna beteko baitu greban. Presoaren egoera salatzearekin batera, hari buruzko informazioa ere banatuko dute egunean zehar. Antolatzaileek herritarrei dei egin diete, edozein momentutan plazatik pasa eta presoari elkartasuna adierazteko. Argitara emandako oharrean azaldu dute Ruizek "denon laguntza" beharko duela bizi duen egoera zailari aurre egiteko.
Deialdiaren arduradunek bi orduko txandak antolatu dituzte, 6-7 pertsonakoak, plazan egun guztian jendea egon dadin bermatzeko. Txandaren batean parte hartzeko interesa dutenek, 688817786 telefono zenbakira idatzi behar dute, bete nahi duten ordu-tartea eta lagun kopurua zehaztuz.
12:30ean elkarretaratze jendetsua egin nahi dute, eta antolatzaileek herritar guztiak gonbidatu dituzte parte hartzera, uneoro osasun-irizpideak bermatuko direla azpimarratuz —pertsona batetik bestera bi metroko tartea, eta posible bada, norberaren eskularruak eta maskarak—.