Merkatu plazako ataritik Lege Zaharren enparantzako garaiera igo ziren herriko elkarteetako danborradako ordezkariak 23:30a aldean, danborrak astinduz. Bertan aritu ziren Imanol Urbietaren abestiak jotzen. Bertaratutako herritarrak jada adi jarri ziren, baita bizilagunak ere beraien etxebizitzetako leiho eta balkoietan.
Gauerdia iritsi baino lehen, Felix Zubia eta Nahikari Gabilondo bertsolariak aritu ziren udaletxeko balkoietatik, eta Pelaio Deunaren ereserkia abestu aurretik, aurten ez zuten suzirik bota nahi izan. COVID-19a pairatu duten zarauztar guztiak gogoan izan nahi izan zituzten isilunea gordez. Ondoren, bai, denek elkarrekin kantatu zuten abestia, guztiz gogotsu, eta jarraian danbor hotsak izan ziren nagusi, jendearen gozamenerako.
