Egungo egoerak hala baldintzatuta, Motxian bertso eskolari aurten ezinezkoa egin zaio ohiko Bertso Astea antolatzea. Hala ere, ez dute ezer egin gabe geratu nahi izan: "Egoerak utzi digun neurrian, saio berezi bat prestatu dugu urtero gure emanaldietara zintzo etortzen zareten entzule horiei guztiei eskerrak emateko". Ekitaldia datorren ostegunean izango da, uztailaren 9an, 20:00etan hasita, Lege Zaharren enparantzan.
Egitarauaren berri ere eman dute: bertso musikatuak izango dira; bat-bateko saioa Oier Aizpurua, Uxue Alkorta, Ane Peñagarikano eta Aner Peritz bertsolariekin; eta Basarri bertsopaper lehiaketako sari banaketa. Sarrera doan izango da, baina lekua mugatua denez, sarrerak aldez aurretik hartu beharko dira Modeloko lehiatilan, egunean bertan, 18:00etatik 20:00etara.