Hartuko diren neurri horietako batzuen berri ere eman zuen Murgak. Hala, ostalaritzari dagokionez, gauean lan egiten duten establezimenduen ordutegiak mugatuko dira. Taberna eta diskotekek 01:30erako itxi beharko dituzte ateak, eta ezingo dute goizaldeko 06:00ak baino lehen ireki. Aforoa %60koa izango da gehienez. Diskoteken kasuan, ezingo da pistan dantzarik egin, eta mahaiak jarri beharko dituzte. “Modu horretan, denbora gutxiago igaroko dute lokal hauetan, eta kutsatzeko arriskua txikiagoa izango da”, azaldu du sailburuak.
Ostalaritzarekin lotuta baita ere, gauerdiko 12:00etatik aurrera terrazetan eserita bakarrik kontsumitu ahal izango da, eta ezingo da hamar lagunetik gorako talderik sortu. Mahaien arteko metro eta erdiko distantzia ere bermatu beharko da.
Hilbeiletan eta hiletetan ere izango dute eragina jarraipen batzordearen neurriek. Gehienez 60 pertsona bildu ahal izango dira hilbeiletan zein hiletetan. Aforoaren %60 bakarrik baimenduko da espazio itxietan.
Maskarari dagokionez, erabilera derrigorrezkoa dela gogoratu du, baina lan esparruan bere erabilera arintzeko aukerak azaldu ditu. “Langileak eserita badaude ez da beharrezkoa izango maskara jantzita eramatea; espazio komunetan, korridoreetan edo bileren kasuan, berriz, bai”.
Dena den, Zarautzen eta beste herri batzuetan murritzagoa izango da ordutegia, uztailaren 17an erabaki hori hartu baitzuen Osasun Sailak, kutsatze kopuruak ikusita.