Zarauzko XXXII. Udako Musikaldiko bigarren emanaldia izango da igande honetan, abuztuaren 9an, Capilla Santa Maria taldearen eskutik. Jone Martinez sopranoak, Carlos Garcia-Bernalt klabeak eta Carlos Mena kontratenorra eta zuzendariak osatzen dute proiektu hau, eta Catene d'Amor izenburua daraman kontzertua eskaini dute, antzinako musika ardatz hartuta.
Emanaldia 20:00etan izango da Andra Mari Zeruratzea parrokian, eta bi zatitan banatuko dute saioa: lehenengoan, Scarlatti, Durante eta Steffaniren piezak interpretatuko dituzte, eta bigarren zatia, berriz, Bononciniren eta Haendelen obrekin osatuko dute.
Gonbidapenak Modeloko leihatilan jaso ahal izango dira kontzertuaren egunean bertan, 18:00etatik 19:45ak bitartean. Publikoaren segurtasuna bermatzeko, emanaldia irauten duen bitartean maskara jartzea derrigorrezkoa izango da.