Bihar Iñurritza biotopoa ezagutzeko ibilaldi gidatua egingo dute. Ohiko moduan, itsas pasealekuko Borghetto gunean jarri dute abiatzeko hitzordua, 18:00etan; parte hartzaileek Zarauzko altxor naturalaz gozatzeko eta gehiago ezagutzeko aukera izango dute bi ordu iraungo duen ibilaldian.
Euskaraz eta gaztelaniaz izango dira bisitak, eta Debanatura elkarteko kideak arduratuko dira gidari lanak egiteaz. Antolatzaileek nabarmendu dute eguraldi txarrarekin ere irteerak egingo direla, eta, beraz, arropa eta oinetako erosoak eramatea gomendatu dute.
Doakoa izango da ekintza, baina bertan parte hartu nahi duenak izena eman beharko du aurretik Turismo Bulegoan. Informazio gehiagorako edo erreserba egiteko, 943-83 09 90 zenbakira dei daiteke.