Atzo iluntzean hasi zen Literaturia jaialdia Modelo aretoan, Garazi Arrularen manifestuarekin eta Metrokoadrokaren Modelo baten bizitza sekretua antzezlanarekin. Gaur 11:30ean hasiko da mugimendua Lege Zaharren Enparantzan; Baginen (Txalaparta) liburua aurkeztuko dute Cira Crespo eta Elena Ziordiak. Segidan beste hainbat liburu aurkezpen egingo dituzte; hemen dago ikusgai zerrenda osoa.
Liburu aurkezpenak ikusi nahi baina karpara bertaratu ezin duenarentzat bada alternatiba: Streaming bidez ikusgai egongo dira aurkezpen guztiak Erlo Telebistaren webgunean zein literaturia.eus-en.
Ekitaldiak ere sarean
Liburu aurkezpenek ez ezik, literaturari estu-estu lotutako hainbat emanaldik osatzen dute Literaturiaren egitaraua. Horietako hiru ere ikusgai egongo dira sarean:
- Gaur 12:30ean, Itzulpengiltza: mundura zabaltzeko eta mundua ekartzeko mahai ingurua Idoia Santamaria, Beñat Sarasola
eta Isabel Etxeberriaren eskutik. - Gaur 18:00etan, Kax-kax-kax! ikuskizuna Katixa Agirre eta Maite Larbururen eskutik.
- Bihar 12:30ean, Literateak mahai ingurua Miren Amuriza, Antton Olariaga eta Aitor Arregiren eskutik.
Kasu horietan ere, erlotelebista.eus eta literaturia.eus izango dira ekitaldiak jarraitzeko bi bideak.