Udazkeneko larunbat euritsua. Etxetik ateratze hutsak ere nagia emango dio zenbaiti akaso, baina, Zarauzko Lege Zaharren enparantzan bada giro petralari aurre egiteko antidotoa; batez ere, literaturzaleentzat. Atzo hasi zen Literaturia jaialdia, eta 12:00etan inauguratu dute azoka gaur eta bihar letren plaza izango den Lege Zaharren enparantzan. Karpan sartu eta aterpean, patxadaz liburuak banan-banan begiratzea gustuko dutenentzat pagotxa dira halako azokak. Momentuz, arrakastatsua ari da izaten Lege Zaharren enparantzakoa, lehen orduetan jende ugari ibili baita joan-etorrian.
Euskal Herriko hainbat argitaletxek dute beren postua karpan, eta gaur egun osoan zehar liburu aurkezpenak izango dira leku berean (Hemen dago ikusgai aurkezpenen ordutegia). 19:30 arte zabalik egongo da azoka gaur eta, bihar, 11:00etatik 14:00etara. Azokara bertaratu ezin dutenentzat, liburu aurkezpenak zuzenean ikusteko aukera dago, alde batetik, erlo telebistaren webgunean eta, bestetik, literaturia.eus-en.