Iheslari ohia da Jaio abadiñarra, eta euskal preso politiko ohiak Eizagirre zarauztarra eta Arkauz arrasatearra. 2017an irten ziren kartzelatik, lau urteko espetxealdiaren ostean.
Imanol Moreno epaileak agindu du operazioa, ustez, iaz Arraia-Maeztun (Araba) atzemandako "zulo" bat oinarri hartuta. Hainbat iturriren arabera, "helburu terroristarekin lehergailuak edukitzea" leporatzen diete, eta Jaioren kasuan, baita "talde terrorista bateko kide izatea" ere.
Babesa Eizagirreri
Atzo ere jende ugari irten zen kalera Ekhine Eizagirreri babesa adieraztera eta atxiloketak salatzera. Astelehenean bezala, 19:30ean elkartu ziren Lege Zaharren Enparantzan, oraingoan, elkarretaratzea egiteko. Datozen egunetan ere egingo dituzte protestarako deialdiak.