Aurten ere berreskuratutako liburuen eta diskoen azoka solidarioa egin dute Merkatu plazan

"Kulturaren bidez baztertze ekonomikoa bizi duten pertsonei laguntzeko" azoka antolatzen du urtero Kaleko Elkartasun eta Kultura Elkarteak. Hego Euskal Herri osoan egin ohi dituzte azoka solidarioak, eta pandemia garaian geldirik egon ostean, asteburu honetan jarri dute berriz martxan ekimena, Zarautzen nahiz Deban.

Urtean 10.000 euro inguru lortzen dituzte berreskuratutako liburu eta diskoen azoken bidez, eta gutxi gorabehera, 20.000 liburu kudeatzen dituzte. Elkartearen "filosofiak" hiru oinarri ditu, haien esanetan: "Kultura, elkartasuna eta ingurumena".

Zarautzen Zigordia kalean egitekoa zen aurtengo azoka, baina eguraldia dela eta, Merkatu plazara lekualdatu dute. 10:30etik 14:30era izan da martxan goizean, eta arratsaldean, 16:30etik 19:30era egongo da zabalik. Bihar ere han izango da postua, goizez eta arratsaldez, ordutegi berdinean.