Bihar izango da Emakumeenganako Indarkeriaren Aurkako Eguna, eta ikasleek ere helduko diote indarkeria matxistaren lanketari. Urola Kostako Ikasle Abertzaleek, esaterako, hitzaldiak prestatu dituzte Zarautzen nahiz Zumaian. Genero problematika hezkuntzan landuko dute bi saioetan; Zarautzen, hain zuzen, Putzuzulo gaztetxean egingo dute hitzaldia, 16:30ean hasita.
IAko kideek Bizitza biolentoen aurrean, ikasle antolakuntza! kanpaina abiatu zuten azaroaren 25aren harira, eta horri lotuta antolatu dute biharko saioa ere. "Egiturazko indarkeriak gaur egun betetzen duen paperari" eta, zehazki, "indarkeria matxistak egun jokatzen duen funtzioari" egin diote azpimarra kanpainan, eta azaldu dute "emakumeen heziketarako ezinbesteko instituzioa" dela hezkuntza-sistema. Hori eta gehiago izango dute hizpide bihar arratsaldean.