Bateragune auzia errepikatzeko erabakia hartu berri du Espainiako Auzitegi Gorenak. Bigarren salako hamasei epaileek aho batez onartu dute berriz epaitzea Arkaitz Rodriguez, Arnaldo Otegi, Miren Zabaleta, Rafa Diez eta Sonia Jacinto. Horretarako, Giza Eskubideen Europako Hitzarmeneko zazpigarren protokoloko 4.2 artikulua hartu dute oinarri, argudiatuta Bateragune auzia bezalakoak salbuetsita daudela epaiketa berriz egiteko debekutik. Gainera, Miguel Colmenero txostengileak eta Navia Osorio fiskalak bat egin dute ondoko irizpideari helduta: adierazi dute zenbait auzi epaitu gabe geratzea saihestu behar dela.
Duela hamar urte baino gehiago atxilotu zituzten bost auzipetuak, eta osorik bete zituzten Gorenak berretsitako espetxe zigorrak; denera, 31 urte.
Gorenaren erabakia argitara atera ostean, mobilizatzera dei egin zuten Euskal Herriko hainbat eta hainbat herritan, eta gaur izan dira protestak tokian toki. Zarautzen, esaterako, elkarretaratzea izan da udaletxe aurrean, 12:30ean hasita, Demokrazia lelopean.
Deialdiarekin bat egin dute, besteak beste, ELA, LAB, Steilas, ESK, Podemos Euskadi, Ezker Anitza-IU, Nafarroako Izquierda Unida, Gure Esku, Emakumeon Mundu Martxa, Bilgune Feminista, Sare, Etxerat nahiz CCOO-Euskadik.
Argazkiak: Gorka Eizagirre eta utzitakoak
