Urteko 10 liburu onenen zerrenda, Garoako lagunen arabera

Zerrenda zalea da gizakia, are gehiago urte baten laburpena egiteko balio badu. Literaturara ekarrita, 2020ko hamar liburu aukeratzeko eskatu die HITZAk Garoa liburu dendako arduradunei. Hemen hautaketa.

Garoa liburu dendako arduradunen ustez, hauek dira 2020ko liburu onenak, aurten euskaraz eta gaztelaniaz argitaratutakoak:

  1. A corazon abierto (Elvira Lindo): Idazle bezala norberak bere gurasoez hitz egitea eta jarduera hori erabateko askatasunarekin egiteko beharrezko distantzia emozional bat mantentzea ariketa zaila da. Elvirak Lindok lortu du.

  2. Amianto (Alberto Prunetti): Amiantoak langile askoren bizitzarekin amaitu zuen. Segur aski, kapitalismoaren metafora onena da: hiltzaile ikusezina da, pixkanaka hiltzen zaitu. Italiako langile klasearen egoera ulertzeko liburu aparta.


  3. Simon (Miqui Otero): Adiskidetasun istorio bat, liburuekiko maitasun istorio bat. Bartzelonatik  bidaia ikusgarri bat Simon gaztearen ikuspegitik. Istorio aparta.


  4. El tren de los niños (Viola Ardone): Eleberri historikoa. Bigarren mundu gerrako Italia suntsituan, Italiako Alderdi Komunistak elkartasun ariketa izugarria burutzen du Hegoaldeko umeei bizitza duin bat eskaini ahal izateko. Hunkigarria benetan.


  5. Como polvo en el viento (Leonardo Padura): Istorio ahaztezin eta hunkigarria. Eleberri analitiko eta kritikoa, zeina, zuzenean irakurlearen bihotzetara iristen den.


  6. Jende normala (Sally Rooney): Maitasun erlazio batean, ezberdintasunek batu, edo banandu egiten gaituzte? Gazte tematika, gazte ikuspegitik kontatua. Gazte orok irakurri beharrekoa.


  7. Xabier Lete, aberriaren kantaria (Alex Gurrutxaga): Xabier Leteren poesia eta pentsamendu poetikoa ezagutzeko aukera aparta, idazle paregabe baten eskutik.


  8. Gauzak direna balira (Joseba Sarrionandia): Aktualitate politikoari, filosofiari eta bizipenei buruzko hausnarketak. Inguratzen gaituen mundua ulertzeko saiakera bat.


  9. Erle langileen amodioak (Aleksandra Kollontai): Sobietar Batasuneko emakumeen bizipenak gertutik ezagutzeko aukera ezin hobea. Gaurkotasun handiko testua.


  10. Dendaostekoak (Uxue Alberdi): Elgoibarko Pitxintxu dendan 42 urtean lanean aritu diren bi ahizpa dira Dendaostekoak. Denda horren historia da Uxue Alberdik liburuan jasotzen duena.