Zarauzko Udalak aurreko urtean jarri zituen martxan Vista Alegreko espaloiak konpontzeko lanak. Iban San Martin Obra Txikiak eta Zerbitzu zinegotziak dio "oso egoera kaskarrean" zegoela "espaloien zoladura", "harrizko lauzak", hain zuzen, "oso higatuta" zeudelako.
Obren bigarren fasea amaitu berri dute orain, eta San Martinek azaldu duenez, galipot gorria erabili dute espaloiak egokitzeko eta "oinezkoen labainketa ekiditeko", "aurreko zoladuraren izaera mantenduz" beti ere.
Trabit S.L. enpresa arduratu da lanak gauzatzeaz, eta udalak 48.395,74 euro (BEZ gabe) bideratu ditu horretarako. Oraindik, baina, ez dute zehaztu noiz eta nola helduko dioten lanen hirugarren faseari.