Aldundiak ere salatu du igandeko eraso matxista

Gipuzkoako Foru Aldundiak ondoko adierazpena argitaratu du, igande iluntzean Zarautzen izan zen eraso matxista arbuiatzeko. Emakumeak adierazi zuen hainbat urtez egin dizkiola tratu txarrak bikotekideak.

"Gipuzkoako Foru Aldundiak, erakunde adierazpen honen bitartez, pasa den urtarrilaren 10ean Zarautzen izandako bortizkeria matxista kasua indar guztiz salatu eta arbuiatu nahi du. Elkarrekin bizi ziren etxebizitzan, bikotekidea erasotzeagatik 48 urteko gizon bat atxilotu dute agresio hau dela eta. Foru erakundeak, aldi berean, elkartasun osoa eta babesa eskaini dizkio biolentzia kasu hau pairatu duen emakumeari, nahiz haren gertuko lagun eta senitartekoei. 

Emakumeen kontrako indarkeriaren aurrean erantzun publikoa emateko Gipuzkoako protokolo instituzionalari jarraituz, Foru Aldundiak bat egiten du Zarauzko Udalak gaur aho batez adostu duen adierazpenarekin. Gizon eta emakumeen berdintasun eza dago halako erasoen oinarri-oinarrian, emakumeak kontrolpean izan nahi dituzten jarrera eta ideia matxistak. Horregatik, beste behin ere, gizon eta emakumeen berdintasunaren aldarrian jartzen dugu azpimarra; pertsonen duintasuna, askatasuna eta integritate fisikoa eskubide urraezinak dira, eta eskubide horien aurka egiten duten jarrerak erabat gaitzesgarriak, bidegabeak eta onartezinak dira, ez dute lekurik gure gizartean. 

Egungo pandemia egoeran, foru erakundeak herritarrei dei egin die bortizkeria matxistaren aurkako jarrera eta konpromisoari eusteko, inoiz baino gehiago erne jarraitzeko, biolentzia jasaten ari diren emakumeek erakundeon eta komunitate osoaren babesa jaso dezaten. Erakunde eta herritar oro gertu gaude edozein unetan haiek laguntzeko.

Donostian, 2021eko urtarrilaren 14an".