Hiru positibo detektatu dira Zarautzen azken orduetan

248,43 tasa du Zarautzek gaur gaurkoz, eta eremu horian kokatuta dago. Eskualdeari dagokionez, 20 positibo izan dira denera, herenegun baino 9 gehiago.

Eusko Jaurlaritzak duela gutxi eman ditu argitara izurritearen gaineko datu eguneratuak, eta horien arabera, Zarautzen hiru positibo detektatu dira atzo egindako probetan. 248,43 tasa du herriak momentu honetan, eta eremu horian dago.

Urola Kostari dagokionez, 20 positibo izan dira eskualdean denera. Herenegun egin zituzten frogetan 11 detektatu zituztela kontutan izanik, azken orduetako zenbakiak okerragoak dira. Azkoitia da Urola Kostan positibo gehien izan duen herria, bost kasurekin. 166,9ko intzidentzia tasa dute gaur gaurkoz, eta eremu horian daude.

Azpeitian —144,55— eta Zumaian —162,82— hiruna kasu izan dira, eta bi udalerriak eremu horian daude kokatuta.

Aian —604,53—, Getarian —106,01— eta Orion —81,54—, aldiz, bina positibo zenbatu dituzte. Aiako kasuan, azken zazpi egunetan hamaika positibo zenbatu dituzte, eta intzidentzia tasak gora egiten jarraitu du herrian. Zazpi egun horietatik bitan ez dute positiborik detektatu.

Eskualdeko gainontzeko herrietan ez da positiborik zenbatu.

792 positibo Hego Euskal Herrian

Azken orduetan 792 koronabirus kasu detektatu dira Hego Euskal Herrian. Herenegun egindako frogetan 683 izan zirela kontutan hartuta, zifren gorakada nabarmena izan da. Positibo horietatik 118 Araban detektatu dituzte, 297 Bizkaian, 210 Gipuzkoan eta 161 Nafarroan. Beste lurraldeetan bizi diren 6 herritarrek ere eman dute positibo.

Hala, positibotasun tasa %7,7 da Araba, Bizkaia eta Gipuzkoan, eta RO Indizea 1,14ra igo da. Azken orduetan koronabirusak jotako 39 pertsona ospitaleratu dituzte hiru lurraldeetako erietxeetan, eta denera 273 lagun daude ingresatuta; horietatik 84, ZIUetan.