Aldaketaren aldeko aldarriek hartuko dituzte kaleak bihar

Zarautzen mobilizazioak egingo dituzte LAB sindikatuak, Kontseilu Sozialistak eta gazte eragileek deituta.

Maiatzaren Lehena da bihar, ospakizun eta aldarrikapen eguna langile mugimenduarentzat. Aurtengoa ere pandemiak baldintzatuko du, baina, gutxienez, eta iaz ez bezala, bihar kalera ateratzeko aukera izango dute; eta halaxe egingo dute. Sindikatu zein eragile, bakoitzak bere aldetik antolatu ditu mobilizazioak. Dena dela, denek nabarmendu dute aldaketaren beharra.

LAB sindikatuak “mugarritzat” jarri du aurtengo Maiatzaren Lehena. Argi du lanpostuen defentsan “bide berezitu bat” hasi beharra dutela: “Etor daitezkeen kapitalaren interesei lotutako lan murrizketei itxaron gabe, aurreratu beharra dugu”. Izan ere, sindikatuko kideen aburuz, “ikaragarria” da jada eman den lan galera, “batez ere, gazteen eta emakumeen artean zein horiek lan egiten duten sektore prekarioetan”. Horiek horrela, eta Maiatzaren Lehenerako hautatu duen leloak dioen moduan, aukera bakarra “aldaketa” dela uste du sindikatuak. “Orain arteko bidearen norabidea aldatzera goaz; zaintza, lana, bizitza eta herria erdigunean jarriz. Eta Maiatzaren Lehena izango da aldaketarako mugarria”.

Hasiera batean eskualdeko manifestazio nagusia Azpeitian egingo zutela iragarri zuen sindikatuak. Baina “eskualdeko egoera epidemiologikoa ikusita”, planteamendua aldatzea erabaki du azkenean, eta mobilizazioak herriz herri egitea. Azkoitian, Azpeitian, Getarian, Zarautzen, Zestoan eta Zumaian egingo dituzte LABek deitutako mobilizazioak, bihar goiz eta eguerdi partean.

ELA sindikatuak, berriz, Aldaketa garaia da lelopean, Hego Euskal Herriko lau hiriburuetan egingo ditu manifestazioak. Lan erreformaren indargabetzea eta zerga sistemaren erreforma eskatuko ditu, besteak beste. Ikusteko dago, ordea, hiriburuetako manifestazioetara zenbat jendek izango duen joateko aukera, Eusko Jaurlaritzak herrien itxiera perimetralari eusteko erabakia hartu baitu. Epaileen esku dago auzia.

Kontseilu Sozialistaren deia

Sindikatuez gain, bihar kalera ateratzeko deia egin dute Urola Erdiko eta Urola Kostako kontse­ilu sozialistek ere. Azkoitian, Azpeitian eta Zestoan manifestazioak egingo dituzte arratsaldean, Historia iraultzailetik prozesu sozialistara! lelopean; Zarautzen, berriz, Kontzientzia berreskuratu, iraultza sozialista antolatu leloa erabiliko dute. Kontseilu Sozialistako kideek adierazi dute “ofentsiba kapitalista bete-betean gauden garaiotan, desjabetuoi geure memoriaren jabetza ere ukatua zaigun honetan, langileona dena langileongandik eta langileontzat aldarrikatzera, eta beraz, antolakuntza komunista aldarrikatzera” datozela.

DEIALDIAK
Zarautz.
– 12:00etan, manifestazioa Musika plazatik abiatuta, LABek deituta.
– 19:00etan, manifestazioa udaletxe paretik abiatuta, Urola Kostako Kontseilu Sozialistak deituta.