Donostiako Udalak surf parka eraikitzeko asmoa du Martutene auzoko Antondegi Gainean, itsasotik lau kilometro eskasera. Aizarnazabaleko Wavegarden enpresarekin batera garatu dute proiektua, eta iragarri zutenetik zeresan handia ematen ari da. Izan ere, Donostiako ”gerriko berdea” deitzen zaion ingurune naturalean egin nahi dute olatu artifiziala, eta proiektuak ingurumenean eragin ditzakeen kalteekin kezkatuta, kontra azaldu dira zenbait elkarte eta norbanako. Hala, surfaren eta ekologiaren alorreko zazpi elkartek Antondegi Berdea – Olatuak Itsasoan kolektiboa eratu zuten martxoan; tartean, Surfider Foundation Europe, Eguzki talde ekologista eta Itsas Enara elkarte ornitologikoa. Greenpeace-n babesa ere jaso du kolektiboak.
Ingurumena babestea helburutzat joz, egitasmoa ez gauzatzearen aldeko hainbat argudio aurkeztu zituen kolektiboak. Orain, arrazoibide horien osagarri modura, Donostian olatu artifiziala egitearen kontra dauden surflariek dokumentu bat aurkeztu dute, 15 arrazoi gehiago aurkezten. Gipuzkoako hondartza guztietako hainbat surflariren sinadurak ere biltzen ditu dokumentuak, tartean Zarauzko surflarienak ere bai: Lo Eizagirre, Miriam Imaz eta Mikel Troitiñorenak. Azpimarratu dutenez, proiektuak ez dio surf komunitatearen eskaera edo behar bati erantzuten, eta aurrerantzean, sinadura bilketa zabalagoa egiteko eta mobilizatzeko asmoa azaldu dute.