32 positibo zenbatu dituzte asteburuan Zarautzen

Kutsatze kopuruen gorakadarekin batera, intzidentzia tasa 621,06ra igo da. Intzidentzia tasa 621,06ra. Ostiraletik igandera 109 positibo atzeman dituzte Urola Kosta eskualdean.

Eusko Jaurlaritzako Osasun Sailak ohi baino beranduago kaleratu du gaur herriz herri atzemandako kasu positiboak jakinarazten dituen txostena. Dokumentuaren arabera, ostiraletik atzora bitartean egindako probetan 109 positibo atzeman dituzte Urola Kosta eskualdean –92 izan ziren aurreko astean–. 5.000 biztanletik gorako herrien artean Azpeitia da eremu gorrian ez dagoen bakarra. Azkoitiak, Oriok, Zarautzek eta Zumaiak 500eko intzidentzia tasa baino altuagoa dute.

Zarautzen zenbatu dituzte positibo gehien asteburuan: 32, guztira –zortzi ostiralean, hamar larunbatean eta hamalau atzo–. Intzidentzia tasa 621,06ra igo da han. Azkoitian, berriz, 29 positibo detektatu dituzte –11 ostiralean, hamar larunbatean eta zortzi atzo–. Egun 934,66ko intzidentzia tasa dute han. Zumaian, ostera, hogei kasu zenbatu dituzte –bost ostiralean, sei larunbatean eta bederatzi atzo–, 1.190,60koa da intzidentzia tasa.

Azpeitian, berriz, 11 positibo zenbatu dituzte azken hiru egunetan –bost ostiralean, bi larunbatean eta lau atzo–. Eremu horian sartu dira berriro han, intzidentzia tasa 289,09koa baita. Orion eremu gorrian daude. Asteburuan bederatzi positibo hauteman dituzte han –sei ostiralean, bat larunbatean eta bi atzo–, eta egun 505,54ko tasa dute. Getarian eta Zestoan, ostera, launa positibo zenbatu dituzte ostiraletik atzora bitartean. Getarian bi positibo baieztatu zituzten ostiralean eta bana larunbatean eta igandean; 424,03ko tasa dute han. Zestoan, aldiz, kasu bat atzeman zuten ostiralean eta hiru atzo. 308,17koa da Zestoako intzidentzia tasa.

Aian, Aizarnazabalen, Beizaman eta Errezilen ez dute positiborik zenbatu azken egunetan. Beizama izan ezik, beste hiru herriak eremu horian edo laranjan daude egun. Aiako intzidentzia tasa 352,64koa da, Aizarnazabalgoa 260,08koa eta Errezilgoa 322,06koa.

Larunbatean baino gehiago

Hego Euskal Herrian atzo, guztira, 1.409 positibo zenbatu zituzten. Araba, Bizkai eta Gipuzkoan 1.010 kasu baieztatu zituzten 7.927 PCR eta antigeno test egin ondoren. Hori horrela, hiru lurralde horietako positibotasun tasa %12,7an kokatu zen atzo. Lurraldeka, 479 lagunek eman zuten positibo Bizkaian, 398k Gipuzkoan, eta 112k Araban. Hala eta guztiz ere hiru lurralde horietatik kanpoko 21 pertsonak ere positibo eman zuten testetan. Nafarroan, bestalde, 399 positibo zenbatu zituzten atzo. Guztira, 2.452 proba egin zituzten han, eta beraz, positibotasun tasa %16,3koa izan zen atzo. 

Osakidetzak ospitaleen egoeraren berri ere eman du. Atzo 36 lagun ospitaleratu zituzten Osakidetzaren mendeko erietxeetan Araban, Bizkaian eta Gipuzkoan. Zainketa berezia behar dutenak edo ZIUn daudenak, berriz, 42 dira egun. Nafarroan, berriz, zazpi lagun ospitaleratu zituzten atzo, horietatik bakarra ZIUn. Gaur-gaurkoz 61 pertsona daude ospitaleratuta Nafarroan, eta beste hamabi ZIUn.

Oinarrizko birsorkuntza tasak edo R0 indizeak beherako bidea hasi du berriz ere. 1,30ekoa da egungo datua, duela sei eguneko berdina. Araba, Bizkai eta Gipuzkoako intzidentzia tasa, berriz, 548,34koa da.