Azken orduetan kutsatze bakarra atzeman dute

Astebetean hamasei kasu positibo baieztatu ditu Osasun Sailak Zarautzen, eta eremu horian jarraitzen duen arren, intzidentzia tasak ere gora egin du, 132,78an kokatuta.

Eusko Jaurlaritzak argitaratu du azken orduetako koronabirus kasuen berri dakarren txostena. Horren arabera, Urola Kostan 11 kasu positibo hauteman zituzten atzo, osteguna; asteazkenean zenbatutako kopuru bera. Azpeitian eta Azkoitian lau eta hiru kasu zenbatu dituzte hurrenez hurren. Kasu horien eraginez, gora egin du intzidentzia tasak Azpeitian –223,39tik 249,67ra–;  Azkoitian, berriz, zertxobait jaitsi da –223,66tik 208,63ra–. Orion eta Zarautzen, bestalde, kasu positibo bana detektatu zuten atzokoan; Orion, 146,77ko tasa dute, eta Zarautzen, 132,78koa. Zestoan, berriz, bi koronabirus kasu detektatu zituzten.

Gainerako herrietan ez zuten positiborik atzeman, eta beraz, jaitsi egin dira herri horietako intzidentzia tasak. Hala eta guztiz, eremu horian jarraitzen dute 5.000 biztanletik gorako eskualdeko herri guztiek. 

Ospitaleetako egoera, hobera

Hego Euskal Herrian 6.915 proba egin zituzten atzokoan, eta horietatik 191k izan zuten emaitza positiboa. Bizkaian zenbatu zuten kasu kopuru altuena: 86. Gipuzkoan 56 izan ziren, Araban 20 eta Nafarroan 28. Positibotasun tasak bere horretan jarraitzen du: jaitsi egin da emaitza positibo kopurua, baina baita lurralde guztietan egindako proba kopurua ere. Araban, Bizkaian eta Gipuzkoan % 3 da positibotasun tasa, eta Nafarroan, % 1,9.

Ospitaleetako egoerak zertxobait hobera egin du azken orduetan. Osakidetzaren ardurapeko erietxeetan 153 lagun daude, horietatik 50 ZIUetan. Araban, Bizkaian eta Gipuzkoan 24 pertsona ospitaleratu zituzten atzo, eta Nafarroan hiru.