Bi kutsatze baieztatu dituzte azken orduetan

Hego Euskal Herriko positibotasun tasa 1,5ekoa da azken datuen arabera, eta joera orokorrak beheranzkoa izaten jarraitzen du. Labi batzordeak gaur arratsaldean jakinaraziko ditu pandemiaren kudeaketari buruz hartutako erabaki berriak.

Eusko Jaurlaritzak plazaratu berri duen txostenaren arabera, sei positibo berri zenbatu zituzten atzokoan Urola Kosta eskualdean: bina Aian eta Zarautzen, eta bana Azkoitian eta Azpeitian. Atzoko positibo bakan horien eraginez, igo egin da apur bat Azpeitiko eta Zarauzko intzidentzia tasa. 157,69koa da Azpeitian eta 77,10ekoa Zarautzen. Eskualdeko gainontzeko herrietan ez dute positibo berririk zenbatu, eta beherantz jarraitzen dute intzidentzia tasek. Azkoitikoa eremu berdetik oso hurbil kokatu da: 66,76 da herri horretako tasa. Orio eta Zumaia eremu berdean dira iragan asteburutik, eta atzoko datuekin are gehiago jaitsi dira herri horietako intzidentzia tasak: 16,31ra eta 20,35era, hurrenez hurren.

ZIUen okupazioak behera egiten jarraitzen du

Atzokoan, 104 kasu positibo zenbatu zituzten Osasun Sailketa Osasunbideak Hego Euskal Herrian, igandean baino 20 gehiago. Guztira, 7.106 proba egin zituzten, eta horietako 104k eman zuten positibo. Datuak horiek izanik, %1,5ekoa da positibotasun tasa Hego Euskal Herrian. Hamar kasu atzeman zituzten Araban, 35 Bizkaian, 44 Gipuzkoan, eta hiru hiru lurralde horietatik kanpo bizi direnen artean. Nafarroan, aldiz, hamabi kasu positibo detektatu zituzten atzo.

Ospitaleen egoerari erreparatuta, hobera egin du egoerak Osakidetzaren ardurapeko ZIUetan. Izan ere, 34 gaixok behar dituzte zainketa bereziak COVID-19aren ondorioz, herenegun baino bost gutxiagok. Ospitaleratze berrien eta ospitaleratuta daudenen inguruko daturik, berriz, ez dute eman. Araba, Bizkai eta Gipuzkoako intzidentzia tasa 62,05koa da, atzo baino apur bat baxuagoa, beraz, adierazle horrek ere hobera egin du.

Nabarmena da datuek hobera egin dutela azken asteetan. Hori horrela, Nafarroako Gobernuak aurreko ostiralaz geroztik bertan behera laga ditu neurri murriztaileak. Labi batzordeak gaur du pandemiaren kudeaketaren inguruko azken neurriak hartzeko bilera, eta arratsaldean emango du horien berri.