Zarauzko Koordinadora Feministak hainbat ekimen antolatu ditu martxoaren 8an ospatuko den Nazioarteko Emakume Langileon egunaren harira. M8 Feministok elkarrEKIN lemapean, hiru egunez luzatuko den egitaraua izango da herrian euren aldarria lau haizetara zabaltzeko asmoz: borrokan jarraitzea, ahalik eta jendarte parekideena eta justuena lortu arte.
Martxoaren 8an, herria apaintzeko hitzordua jarri dute 18:00etan Udaletxe Plazan, eta 19:00etan manifestazioa abiatuko da bertatik. Martxoaren 10ean, ostegunean, 18:30ean hasita 'Nolako zaintza sistema komunitarioa behar dugu?' hausnarketa solasaldia eskainiko dute Emakumeen* Etxean. Martxoaren 12an, berriz, Musika plazatik abiatuta trikipoteoa eta errezitaldi kolektiboa eskainiko dituzte 18:00etatik aurrera. Gainera, egun osoan zehar, Morroxka eguna ospatuko dute Gaztetxean, hala nola, bazkaria, dantza eta festa egingo dituzte.
Itziar Morenoren erakusketa ikusgai
Gaurtik hasi eta hilaren 31ra bitartean, Itziar Moreno euskal preso politikoaren Gorputz eta gogo erresistentziak erakusketa ikusgai izango da Arrano eta Eguzki tabernetan.