Bertso Astea 2022

"Zarauzko Bertso Asteak arrakasta polita izaten du herrian"

Urtean zortzi bertso ekitaldi antolatzen ditu Zarauzko bertso eskolak. Horietako bi, bertsolari gazteen Lizardi Saria eta Bertso Astea. Hona hemen Bertsoa.eus atariak Maite Aizpurua Zarauzko Motxian-Etxebeltz Bertsoguneko kideari eginiko elkarrizketa.

Zarauzko Bertso Asteak 25. urtea borobilduko du bihartik larunbatera, Motxian-Etxebeltz Bertsogunearen eskutik. Motxian bertso eskola sortzearekin etorri zen Bertso Astea ere, 1997an eta urteen poderioan egungoaren moldea hartu: bertso jarri musikatuak, beste herriko bertso eskkola batekin desafioa eta Txepelketa tabernaz taberna. Maite Aizpurua da egungo antolatzaileetako bat. Beraz gidatu gaitu Zarauzko Bertso Astearen bidean barrena.

Noiz eta nola sortu zen Zarauzko Bertso Astea?
1996an sortu zen Motxian bertso eskola Zarautzen. Argitalpen bat jarri zuten martxan bertsolariei elkarrizketak, bertso-jarriak eta abar argitaratuz eta hurrengo urtean, bat-batekotasunari ikusgarritasuna emateko antolatu zen lehenengo Bertso Astea. Hasiera batean, saioren bat plazan, hitzaldiren bat edo beste eta pixkana pixkanaka forma hartuz eta oraingo eredura etorriaz. Hiru eguneko zikloa antolatzen dugu orain eta halaxe egin dugu aurten ere.

Motxian-Etxebeltz bertsogunearen eskutik dator aurten...
Bi bertso eskola zeuden lehen Zarautzen, Etxebeltz umeena eta Motxian helduena eta iaz erabaki genuen bi bertso eskolek bat egitea eta Motxian-Etxebeltz Bertsogunea sortzea. Geroztik dena elkarrekin antolatzen dugu eta bertso eskolan ere elkarrekin funtzionatzen dugu, eta lokal berean gaude helduen bertso eskola eta umeena (lehen umeena ikastolan zegoen).

Zer dakarzue aurtengorako?
Ostegunean bertso musikatuak izango ditugu. Aurten, 25. urteurrena izaki bertso eskolako kideen sortak kantatuko dira. Gero ostiralean, iaz oriotarren kontra egin genuen desafio eguna, eta aurten Erniarraizkoen kontra ariko gara. Arratsaldean bertso-pilotan eta afalondoan bertsotan. Larunbatean, txepelketa egingo dugu. Parte hartu nahi duen guztiak du libre eta tabernaz taberna izaten da. Bi bertsolarik kantatu eta bat aurrera, final eta guzti.

Erlazionatuak

Betiko formatura itzuliko da Bertso Astea ere

Zarautz

Motxian-Etxebeltz bertsoguneak Bertso Astea antolatu du beste urte batez eta, aurtengoan, ohiko formatuan egiteko moduan izango dira, pandemiak era...
Aner Peritzek irabazi du Basarri Bertsopaper Saria

Zarautz

Zopa hozten ari zaizu bertso sortagatik jasoko du saria uztailaren 7an, Bertso Astearen barruan. Epaimahaiak "bertsoen berrikuntza formala" nabarme...