Zarauzko Alderdi Popularrak salatu du bizikleta lapurretak areagotu egin direla herrian. Udaltzaingoaren iturriak aipatuta, ohar bidez azaldu dute egunero bi bizikleta lapurtzen dituztela, bataz beste. Udan, berriz, hamar izaten direla gaineratu dute, eta, ondorioz, "mila bizikletatik gora" lapurtzen dituztela urtean.
Popularrek Udal Gobernuari egotzi diote egoera horren ardura ez dutelakoan neurririk hartu lapurretak ekiditeko: "Oharkabeko gertaera da udalarentzat eta uste dugu beharrezkoa dela poliziaren presentzia handiagoa lapurrak uxatzeko".