Ez dira urrutira joango Pagoeta mendi elkartekoak datorren asteburuan. Izan ere, Gazume mendiari itzulia egingo diete, Errezil inguruan. Irteera igandean izango da, hilak 29, eta ohi bezala, 07:30ean Agoueseneko biribilgunetik aterako dira.
Zailtasun teknikorik gabeko mendi buelta egingo dute Gazumen. 12 kilometro inguru ibiliko dira, eta 500 metro inguruko igoera-jaitsiera metatua izango du.
Mendizale elkartekoek azaldu dutenez, Gazume mendi ezaguna da askorentzat, baina normalean bisitatzen ez diren tokietatik ere igaroko dira igandean: "Oro har, inguru ezaguna da gutako askorentzat, baina oso litekeena da bazter batzuk ezezagunak izatea; adibidez: Azulegiko meategia edo Errezilgo meatze-barrutia". Egingo duten itzulia, zehazki, honakoa izango da: Iturriotz-Indoko lepoa-Azulegiko meategia-Zelatun-Iturriotz.
Izena Mendizabal kinkila-dendan eman behar dute txangoan parte hartu nahi dutenek. Epea gaur hasi eta ostiralera arte egongo da zabalik.
Ibilaldiaren xehetasun guztiak Pagoeta Mendi Elkartearen webgunean aurki daitezke.