San Nikolaseko XI. Traineru Jaitsiera jokatu zuten atzo eguerdian Portugaleten hainbat arraun taldek. Denboraldiaurreko lehen estropada izan zen, eta martxa hartzeko estreinako lehia izan zen. Zarautz Arraun Elkarteak ordezkaritza bat izan zuen uretan: emakumezkoen trainerua, hain justu ere.
Erlojupeko proba izan zen, eta, guztira, emakumezkoen 15 ontzik hartu zuten parte. Donostiarra izan zen garaile (13:30,61), eta haren atzetik sailkatu ziren Orio eta Hondarribia, hurrenez hurren. Zarautz Gesalaga Okelan taularen erdialdean kokatu zen, zazpigarren postuan, lehen sailkatuarengandik 51 segundora. Deustoko ontzia gainean izan zuen, baina ehuneko batzuen aldeagatik, zortzigarren geratu ziren.
