32 urteko emakumezko baten hilotza aurkitu zuten atzo Gasteizko apartamentu hotel bateko logela batean, indarkeria zantzuekin. Ertzaintzak adierazi duenez, indarkeria matxista gisa ikertzen ari dira kasua, eta haren bikotekide ohia atxilotu dute dagoeneko Zaragozan. Bi asteren barruan Euskal Herrian gertatzen den bigarren hilketa matxista da.
Urola Kostako Itaiak gertatutakoa salatzera deitu ditu herritarrak, eta elkarretaratzea egingo dute horretarako gaur 19:00etan Lege Zaharren enparantzan.
Zarauzko Udalak, bere aldetik, bihar eguerdirako deitu du hilketa matxista gaitzesteko elkarretaratzea. Zarauzko Bilgune Feministak eta Morroxkak taldeak ere biharko deitu dute protesta. 18:30ean egingo dute Lege Zaharren enparantzan Aski da! lelopean.