Laineza. Kultura haragi bizitan liburua kaleratu du Lanartea euskararen langile profesionalen elkarteak, kulturgintzan aritzen diren dozenaka sortzaileren gogoetak eta kezkak jasotzen dituen lana. Askotariko diziplinetan aritzen diren 50etik gora sortzailek parte hartu dute liburuan, eta tartean dira Zarauzko hainbat herritar, hala nola Ana Galarraga, Gorka Arrese, Andoni Egaña, Anjel Lertxundi, Nerea Loiola eta Aner Peritz.
Lanartearen koordinatzaileak idatzi du, berriz, lanaren hitzaurrea, Amagoia Gurrutxaga Zarauzko bizilagunak, hain zuzen ere. Hala dio hark: "Liburu hau premia larri batek ekarri du mundura. Kultura euskaraz egitea eta kultura sortuz bizitzea laineza huts ez dela erakutsi beharrak". Haren arabera, euskalgintzaren eta kulturgintzaren azpian bizi diren sortzaileen berri ematea da elkartearen xedea, eta kulturaren egoera ikusaraztea ere bai.
Euskal Editoreen Elkartearen laguntzaz argitaratu du liburua Lanarteak, eta egunotan Durangoko Azokan izango da salgai, Lanartearen erakusmahaian. Honako lotura honetan irakur daiteke Berriak liburuaz argitaratutako albistea.