Dagoeneko Urola Kostako hiru herritar aurkeztu ditu EH Bilduk alkategaiak. Getarian Nika Lertxundi izango da berriro hautagaia. Lertxundi Getariako alkate da azken agintaldian. Aiako EH Bilduren alkategaia, berriz, Eñaut Guruzeaga da. Zumaian Alex Oliden da koalizioaren zerrendaburua, eta alkatetzarako hautagaia.
Gipuzkoako programaren aurkezpena Donostian
Hautagaien aurkezpenaren aurretik, ordea, ostegunean (martxoaren 26an), EH Bilduk maiatzeko foru hauteskundeetarako aurkeztuko duen programaren berri emango dute, Donostiako Gros auzoan zabalduko duten EH Bilgunean. 11:30ean izango da. "Programa herritarrekin batera landu dugu eta orain lan guzti horren emaitza aurkezteko garaia iritsi da". Programa lantzeko prozesu parte-hartzailea urtarrilaren 17an hasi zutela gogorarazi dute: "Hamaika aste oso intentsoak izan dira, herritarrekin eta eragileekin etengabe elkarlanean. Hamar bat lan saio monografiko egin ditugu Gipuzkoako eskualde guztietan, dozenaka pertsona eta eragilerekin egon gara eta ehunka ekarpen jaso ditugu".