Korrontzi Dantzan Gala antolatu du Korrontzi musika taldeak, eta Euskal Herri osoko 14 dantza talde gonbidatu ditu jaialdian parte hartzera. Guztira, 300 dantzaritik gora ariko dira, euskal dantzari eta koreografo ezagunek sortutako dantzak eskaintzen. Jalgi dantza taldea ere gonbidatu dute, eta bertan izango da. Gala Iruñeko Baluarte jauregian izango da larunbat honetan, ekainaren 18an, 20:00etan, eta ETBk grabatuko du.
Jaialdiak Jalgiren ikasturte amaierako emanaldiarekin bat egin duenez, egun bat atzeratzea erabaki dute. "Korrontziren galara joatea baztertu ezin dugun aukera paregabea da, bai guretzat dantzari bezala, bai Jalgi dantza talde osoaren proiekzio eta jhazkundeari begira. Horrenbestez, bi ekitaldiak bateragarriak izan daitezen, gure emanaldiaren data larunbatetik igandera aldatzea erabaki dugu". Ikasturte amaierako saioa Iñurritzan izango da, ohi bezala.