Gaur goizean eman diote hasiera emakumezkoen Pro Zarautz txapelketari, eta Nadia Erostarbe zarauztarrak lan bikaina egin du lehen jardunaldian. Europako sailkapenean hirugarren postuan dagoen surflari gaztea hurrengo txandara pasa da.
Hasiera batean, emakumeen txapelketan 32 surflarik izena eman bazuten ere, 29k abiatu dute lehia. Eguraldi haizetsua izan da gaur Zarauzko hondartzan; ipar-ekialdeko haizeak sortutako itsaskia nagusitu da, eta horrek beren abilezia zorroztera behartu ditu surflariak. Dena dela, goizean goiz haize gutxiago izan denez, itsasoaren egoerak lehen orduan uretara sartu diren surflariei puntuazioei dagokionean "mesede egin" diela aitortu dute txapelketako antolatzaileek. Zenbait surflarik 17 puntu baino gehiago eskuratu dituzte beren txandan (20 gehienezko puntuazio izanik), Justin Dupont frantziarrak eta Teresa Bonvalot portugaldarrak esaterako.
Euskal surflarien artean, Nadia Erostarbe zarauztarra eta Garazi Sanchez dira hurrengo txanda jokatzeko txartela lortu duten bakarrak.
Argazkiak: World Surf League