EABk “haserrea eta kezka” agertu zituen, “beren eremu pribatuan adierazpen edo ekimen konkreturen bat egin duten interpreteen” parte-hartzea duten hainbat ekoizpenen aurka sare sozialetan sustatutako boikot kanpainen aurrean.
500 bat aktore, zinemagile, ekoizle, casting zuzendari, bertsolari, komediagile, idazle, musikari, kazetari, aurkezle, eta dantzarik egin dute bat Euskal Aktoreen Batasunak duela egun batzuk zabaldutako oharrarekin. Horien artean daude Uxue Alberdi, Nagore Aranburu, Iraia Elias, Xabier Euzkitze, Elena Irureta eta Kandido Uranga eskualdeko bizilagunak.
Aktoreen sindikatuaren salaketaren atzean dago, besteak beste, Atresmediak estreinatu zuen La casa de papel telesailaren aurka sare sozialetako erabiltzaile batzuek egindako kanpaina. Itziar Ituño da aktore protagonistetako bat, eta zenbait sektore eta hedabide espainiarzaleetatik saio hori bikoteatzeko deia egin dute, aktorea publikoki agertu izan delako euskal presoen eskubideak bermatzearen alde.